又黎個一星期記, 呢排都勁無mood打日記囉...
星期三, 今日都係成日返工, 上晝返到下晝咁... 至於有咩發生過, 已經唔記得lu~
星期四, 今日返學, 其實今日係最後一個上堂日, 因為我星期五係off的, 要好好咁享受下呢個返學日~ 第一堂上381, 今日竟然係嚮呢堂度無訓過覺囉, 以我記憶所及, 呢堂我係第一堂無訓過而又有聽書o既一堂381, 最後一堂先係咁, 有時o的野當你知道會失去你先會學懂珍惜. 之後就無150上, 行o左陣mega sale, 呀, 終於都見到有monopoly, transform 同淘大點心賣啦, 同晶晶佢食o左盒燒賣做早點~~ 之後o既162, 本來都唔諗住訓架, 但係... 佢又熄哂o的燈, 又講野mono tone, 最後都訓o左...... 之後個lunch就去o左食呢個南北, 話哂最後一日丫嘛, 咁就約o左一圍o既同學去飲茶, 本來呢, 就係諗住食晏o既, 點知最後呢, 我地差唔多等到兩點半o的點心都未黎過, 最後把心一橫, 叫下午茶, 最後我地total叫o左五十二碟點心, 計落差唔多一人要食五碟~~ 埋單o既時候五十蚊都唔駛, 幾抵呀~~ 但係為o左呢餐茶, 之後上最後一堂o既185都遲到... 都唔明點解佢個廚房咁慢... 上完185, 最後一堂都有片睇, 好野~~ 之後就去o左幫上年o既FYP做野, 做o左好耐都做唔掂... 都唔知咩事...... 最後, 當我上完最後一堂o既150 tutorial之後, 都要去再做過... 做到成九點先返屋企... 但係都做唔掂, 咁無辦法了, 都係靠你地自己吧~ 咁就完成o左我o既大學上課生涯~~
星期五, 今日本來係off的, 但係下晝就返o左去學校度溫書, 溫溫下肚餓之際, 諗住去搵呀熙食Tea, 點知俾我嚮佢個254 demo度見到世界人情o既冷暖~ 人性o既真面目~ 其間接到個電話話星期一去interview, 去機場度返工?!(請記住呢日之後繼續睇落去) 254之後成五點先食Tea... 食完Tea一陣, 收到屋企o既來電, 話呀婆又入o左醫院?! 哎呀, 即刻走人, 唉... 最後成家人成十點先食飯... 食宵夜時段, 原來真係平好多架喎~ 但係希望呀婆佢快o的無事就好了...
星期六, 今日要返工, 無驚無險同埋一路玩倉庫番咁就過o左一日, 今日o的時間好似過得特別快咁o既~~
星期日, 今日當然都要返工啦, 今日o的時間又好似過得特別慢咁喎...
星期一, 今日下晝要去interview, 要入機場喎, 好遠遠遠遠... 剩係搭地鐵都要成個鐘, 計埋等車, 仲唔要個半鐘, 都係早少少出門口好, 早o左兩個鐘去搭車, 好快趣咁就有車, 最後就係早o左大半個鐘返去, 一點二度就到, 打俾佢無人聽, 睇佢都應該係食緊飯架啦, 所以就嚮出面度等, 我都醒目架啦, 帶定書去溫, 原本係for搭車o個一個鐘o既, 而家可以溫埋, o岩哂啦~~ 等到咁上下先再去搵佢, 入到去, 填完張form, 做埋個written test(事後發覺有一條我答錯o左喎~), 咁就到interview, 個interview好casual, 吹吹水咁就攪掂(請再記埋呢日之後繼續睇落去), 最後就搭巴士返屋企, 貴好多呢陰公... 差成十蚊咁濟... 但係沿途可以欣賞到青馬大橋o既景色~~ 十蚊... 真係貴o左o的, 睇黎若果以後要坐o既話, 趁住仲有學生半價, 都係搭多o的地鐵好了~~ 之後就趁有機會, 買o左個下午茶俾媽媽食~~
星期二, 今日全日都嚮屋企度溫書, 訓覺, 溫書...
星期三, 今日要返學校開工, 我都好佩服自己, 明明考試未溫哂書都仲有心情返工~~ 而嚮呢個返學(返工)o既途中, 收到星期一去in o個間公司o既電話, 話俾offer我喎?! 人工仲俾我預期之中高少少添, 但係就返機場咁遠同埋要返shift. 我相信佢應該都幾等人用, 因為由佢叫我interview至到話請我, 加埋都唔夠一個星期, 我同o左同學講, 相信除o左佢係勁等人用之外, 亦都可能呢份工係一舊豬頭骨... 不過唔緊要啦, 三個月o既probation, 有咩事都係七日通知咁, 應該都ok o既~~ 騎牛搵馬咁啦~~ 只係唔會係騎虎難下就ok了~
