三月十七至二十o既project週

星期二, 今日返十二點, 但係都遲到...... 仲遲成有十分鐘咁多, 但係呢堂係Quiz黎架喎...... 好彩最後都無乜事...... 之後上堂, 上堂同上堂... 夜晚做project同proposal...... 雖則FYP係完o左, 但係呢......隨之而來的是三個附送o既Project...... 唉, 都唔知點死俾佢......
星期三, 今日返早, 話說嚮上堂o既時候, 晨咁早喎, 我呢o的手無摶雞之力o既文弱書生又點敵得過周老前輩o既窮追猛打丫, 上堂o個時唯有屈服嚮佢o既神功之下, 但係估唔到prof佢為o左救我, 出奇不意地嚮個power point度加上一招, 就可以將我輕易由周老前輩手上拯救出黎, 果招就係汽車effect, "招, 招, 招, 招", 果然係好power o既point呀下, 咁我就醒o左...... 上完堂之後就Barn, Barn完之後就上tutorial, 坐嚮度訓o左...... 放學之後去o左見工, 但係呢間o既人工就真係...... 夜晚都係做project.
星期四, 今日返學, 上堂, 放學, 食野, 做project, 十一點先走, 個project做到我火都黎埋, 真係小小聲, 點解一個唔係case sensitive o既program係case sensitive架, 咩oracle加php呀, 真係頂！！！！
星期五, 今日返學都唔知為乜, 實際係無學過野咁囉, 呀豬又唔返喎, 攪到無人拎野去見sponsor, 咁無辦法, 唯有返去...... 本來可以訓多幾個鐘架嘛, 一日都係呀豬, 死豬！！！ 返去做Lab, 易到呢...... 無野講. 真係早知唔返囉...... 之後去見sponsor, 過程大致順利~~ 幾好幾好, 唔錯唔錯~~ 夜晚, 掛住打太鼓, 攪到個project做到成兩點先訓...... 唉...... 無耐...... 勁眼訓......
睇黎呢個星期都唔方有咩時間訓, 要趕project......

三月十二至十六 o既 FYP 週

星期四, 今日放學就返o左屋企, 星期六就要fyp present, 呢幾日個腦都係咁諗present o既script, 究竟點講好呢, 個ppt又應該點呢. 成晚對住個ppt都唔知做過o的乜.
星期五, 返學, 做Lab, 食飯, 之後同楷同學去o左做254, 咩話, 254? 係呀, 睇住佢玩ultrasoinc, 粒野好細架咋喎, 但係呢...... 發覺佢呢個project都唔易做... 不過都係唔好潑佢冷水, 世界上都無咩話唔得o既~~ 之後就去o左打波, 原本諗住打到五點就去上堂, 點知...... 嚮一個俾人唆擺o既情況之下走o左差唔多大半堂打到六點先去繼續Lab...... 攪到晶晶同學佢擔心添, 唔好意思...... 原來佢係驚我打波打到斷手斷腳, 雖則我係少o左o的要黎做buffer o既膏o者(咩膏呀? 肥膏呀, 明唔明? 硬係要講人地o既點出黎架喎...... 又咩點呀? 你話咩點就咩點啦, 弱點又好, 特點都好啦), 但係我o的骨格都未至於精奇到咁易斷o既~~ 之後就去o左傾呢個FYP o既present, 傾傾傾, pre pre pre-present, pre pre pre-demo到十點先走...... 未食飯添...... 咁夜, 同佢地落坑口食埋飯先返屋企~~ 去到新豪茶餐廳(都唔知係唔係軍蠔豬佢專登開黎陰我地), 唔...... 鴛鴦炒飯, 好似唔錯咁喎~~ 結果我同Denny佢都叫o左黎食, 由於我極度肚餓o既關係, 嚮Denny佢食到差唔多一半o既時候我就差唔多食哂~~ 點知...... Denny佢發現o左佢碟飯度有隻有手有腳同有翼o既野(係咪真係有手就唔知, 但係就一定有腳！！！) 攪到佢差唔多即時反胃咁滯, 而我...... 望住自己o個碟差唔多食哂, 又相信係同佢o個碟一齊煮o既飯o既時候, 我都真係唔知繼唔繼續食落去好...... 上星期我先去廁所去到腳軟, 我聽日就要黎present, 今晚都仲搵o的咁o既野黎攪?! 你都真係咪話咩呀...... 雖則我都好似未飽咁, 但係一諗呢隻咁高蛋白質o既野(高蛋白質呢個term係呀軍蠔豬佢講架~~) 我都無心機食落去...... 最後, 間野只係收翻Denny佢杯野飲o既錢就算, 而Denny亦都反住胃咁返屋企......
夜晚, 我都係掛住聽日present o既野, 好驚, 仲發o左個惡夢添, 你都咪話唔驚......
星期六, 今日打緊三號風球, 今日亦都係FYP o既present. 都真係唔好講笑, 估唔到我FYP o既presentation係嚮一個暴風雨之中渡過. 返學o既時候, 上到Van仔, 我係第一個人上車, 等o左差唔多成五分鐘先有第二個人上車, 最後個司機叫我地轉佢架彩虹車, 都好o既, 咁攪法, 等兩個鐘都未必會齊人開車. 返到去, 食個飯, 就上去搵o左間房黎pre presentation, 到夠鐘, 嚮present o既o個間房出面, 一條黑暗o既走廊度, 等o左都有成十分鐘, 諗緊我陣間要講o既野o同時, 另一方面諗緊點解之前o個group會overtime咁耐? professor點會咁多野問o既, 嚮度抽插緊佢地?! 咁佢有條抽插人o既癮, 好自然陣間就會輪到我地...... 嚮呢個又驚又震o既心情之下, 度門終於都打開o左, 而Dr. Muppala亦都面帶笑容咁望一望我地就話, "ok, you can come." 而我地就用o左少於五分鐘o既時間, 全部人完全合拍地根據之前傾好o左o既工作, 流暢地set好哂o的機, 可以開始我地o既presentation. 四個人整齊地一字型企好, 正當我想開聲o既時候, 估佢唔到地一開始就問我地叫咩名先, 諗翻起, 又o岩o既, 雖則陣間我都會介紹, 但係佢地問一問係會比較穩陣o的. 亦都估唔到o既係, 佢竟然一講就話我係Ricky?! 我都即刻愕一愕...... 點解佢會知我係叫咩名架...... 睇個powerpoint就估到?! 果然係professor! 之後我就開始我地o既presentation. "Good afternoon Dr......." 順序地流暢地我地o既presentation. 但係當再到我o既時候, 我竟然... 竟然嚮仲有時間o既情況之下講少o左o的我想講o既野呀, 早知我就寫埋落個powerpoint度提自己啦, 咁點算呀...... 突然靈機一觸, 可以嚮demonistration 度補飛, 唔...... 陣間一定要講翻！！！ 之後就到我地o既demonistration. 個過程亦都大致上無乜問題, 係個prof嚮其中一part有o的confuse, 但係呢個問題好快已經解決, 最後到我o既demonistration, 過程大致順利, 而我亦都講翻我之前miss o左o個一個point. 最後就到比較擔心o既Q&A Session, 但係竟然佢只係問o左我地幾條問題, 亦都唔係太難, 仲攪到我地之前準備哂佢會點插點插, 我地都handel到哂o的問題, 最後亦都不可多謝我地o既老闆 Dr. Muppala, 佢無論嚮呢個presentation同埋我地o既project上面都幫o左我地唔少(雖則唔知佢識唔識睇我呢個中文o既多謝~~ 佢應該唔識睇o既多......) 咁就安全地渡過我地呢個FYP~~ 好野~~ 放學, 都仲係三號風球, 而雨亦都越落越大. 好開心呢個FYP可以嚮呢個暴風雨之中安全地渡過~~
搭車o既時候, 俾我搭到架免費車喎~~ 去寶琳新都城~~ 車錢都慳翻~~
夜晚, 本來諗住做HUMA100F o既功課, 但係個網成晚都上唔到...... 最後我就咁就休息o左一晚.
星期日, 本來今日應該係去拜山, 但係基於今朝零晨十二點先除下三號風球, 最後都係取消o左, 但係點知原來我地係俾浣熊玩哂(咩浣熊? 個颱風個名呀~~ 正一熊人黎架囉, 俾佢玩哂), 咁就無啦啦多o左日假放, 本來, 亦都係"本來"係諗住做功課, 但係呢, 最後由於茵茵打黎叫一叫醒o左我(真係只係叫一叫醒咋~~)話俾我知個網都仲係死o既關係呢, 咁最後我就訓到一點先起身~~ 起身o既原因係因為, 要食飯...... 所以食完飯之後又再訓過~~ 到差唔多四點o既時候, 唔...... 應該都係時候起身啦~~ 起身食Tea~~ 好味~~ 跟住再訓過...... zzZZＺＺＺ 到七點...... 真係要起身啦, 起身食飯~~ 如是者, 咁就一日~~ 得翻個夜晚, o個份功課o既deadline已經過o左, 而個網亦都終於都上到(我小, 玩野咩！！！)咁就做埋份功課, 睇個獎門人, 咁就一日~~
果然, 放假就真係放假~~ 我都係鐘意返工同去玩多o的~~
星期一, 今日返工(溫書), 返學(訓覺), 返工(溫書打日記), 放學去睇獸醫, 終於都要食抗生素, 又要返去覆診, 夜晚, 溫書...... pk喇, 聽日Quiz都未溫好添......
MSN果然唔係一件好o既溝通工具, 好容易就會令人產生誤會......

---

內容最後更改於 2008-04-22 00:20

三月初七至十一

星期六, 今日要返工, 返到去, o的時間好似好快過咁, 咁就一日~~
放工, 要返學呀...... 多謝joanna姐姐請我食魚旦燒賣~~ (唔係我叫佢做姐姐架, 係佢自己話自己係架咋, 唔關我事架~~ 事實上佢都唔係姐姐o者~~ 佢仲咁後生~~) 返去做埋個project呀, 唉...... 真係難頂, 又肚餓又攰...... 個training report都未寫好...... 最後就落o左去cafe度買薯條頂肚...... 途中Denny叫我幫佢買汽水喎, 咁我又等緊薯條喎, 咁就去o左汽水機度幫佢禁汽水出黎, 好, 入o左錢, 禁o左一罐汽水出黎, 一揭起個汽水機, 竟然俾我見到有兩支水trap o左嚮度喎...... 我要o既係汽水, 咁唯有拎o左佢出黎先啦, 唔係我點可以拎我支水呢~~ 但係呢, 竟然越拎越多, 總共俾我地拎o左七支水加俾錢買o既一罐汽水~~ 多謝Denny~~ 唔係得佢叫我幫佢買罐汽水, 我地都無得黎咁多水飲~~ 最後做fyp做到十一點先走~~
星期日, 今日都係要返工, 都唔知係好彩定係唔好彩, 返晏, 尋晚做到咁夜, 有得訓晏o的~~ 但係返到去, 竟然係遇著個未返過呢間館o既新人......
夜晚, 做做下野肚痛...... 肚痛...... 一晚去廁所去o左四次, 十點半, 十二點半, 兩點半, 六點半...... 每隔兩個鐘頭一次, 每次十五至卅十分鐘, 我頂...... 食藥咁囉, 去廁所去咁多次, 去到個pat pat都痛..... 第二朝去睇醫生, 估唔到佢竟然係估我尋日食錯南記o既春卷, 我就真係唔知啦, 總之就難頂啦...... 睇完醫生, 本來醫生話寫兩日假俾我, 但係衰格o既我休息o左唔夠半日就走o左返學, 無辦法, 要傾埋fyp o的野, 唉...... 野都食唔落...... 又好夜先返屋企, 真係得閒死唔得閒病, 但係偏偏呢個時候先黎病......
星期二, 尋日終於都唔patpat痛, 但係今朝就走黎頭痛......唔通個頭生o左嚮個pat pat度?? 但係頭痛都無辦法, 都要返學, 返去見老闆......唔...... 唔返唔得...... 上完堂, 返到屋企, 都係早o的訓, 唔係聽日又返早......
星期三, 今日返早...... 今日終於都又唔pat pat痛, 又唔頭痛啦, 但係走黎喉嚨痛囉...... 攪錯呀, 唔係呢樣痛就係o個樣痛, 唉...... 最後走o左去睇獸醫...... 唉...... 睇黎呢個禮拜都要食藥渡過...... 無陰公呀......

二月廿九至三月初六o既週記

星期六, 今日當然要返工啦~~ 但係尋晚諗project o的野諗到3點幾先訓, 真係無陰公囉......
返到去, 見到呀邊個邊個呀, 但係可惜...... (都係唔繼續講落去)
夜晚, 要改個report, 改到無心機......
星期日, 亦都係要返工, 原本都無乜野, 但係臨收工o個陣時, 有個細路嚮度玩燈, 亂咁禁o的燈制, o個陣時個counter得我一個不特止, 仲要係電話嚮囉, 我頂丫, 細路, 我記住你, 你唔好俾我見到你!!! 夜晚, 改report改到想死......
星期一, 返學, 一早就要整埋份report send俾CT睇, 真係唔得你死...... 一晝一放o左學就返o左屋企, 有pizza食耶~~ 多謝呀成, 下次有o既話預埋我1~~
231個midterm出o左, 唉...... 早知今日何必當初呢~~ (有早知, 無乞兒啦...... )
星期二, 今日上晝終於都唔駛上301個lab啦, 唔駛返早, 都不知幾好, 可以訓多兩個鐘, 爽呀~~ 實際做o左o的乜都已經無心機記翻起啦, 總之唔係report就係project, 唔係project就係homework啦, 真係......
星期三, 今日返早, 好難得今日竟然會早過呀Sir入課室呀~~ 之後Barn, Barn完就食飯, 飯完之後就再Barn.
飯o既時候, 見到豬同學喎, 咁就同佢講話陣間去傾fyp喎, 你會黎架嘛, 咁呀豬同學就話：『唔...... 我四點鐘要走, 有野做...... 咁... 三點走堂黎都得o既~~』如事者, 我地上完堂之後見到Denny, 將豬同學同一句說話講o左俾佢聽, 咁就佢都走埋堂, 黎傾fyp, 但係呢, 三點o既時候, 當然, 我地見到Denny同學o既出現, 但係就見唔到豬同學o既出現, 之後打俾佢, 條友仔竟然話上緊堂!? 我頂...... Denny都頂...... 早知佢去食野先, 唔傾fyp住, 豬同學又話四點走, 而家又上堂, 攪到Denny佢唔食野都黎傾FYP, 豬同學, 你咁樣太唔得啦, 你咁樣對Denny o既話呢, 你地o既感情唔可以維持得好耐架咋喎~~
上晝Barn o既時候做Report, 做得四份之一...... 下晝Barn o既時候, 原本諗住傾一個鐘fyp, 另一個鐘做report, 但係由於豬同學o既關係, 攪到我連份report都做唔成！！！ 要返屋企做...... 夜晚都係做多四份之一, 即係一半......
星期四, 今日要見一見老闆, 但係呢, 呀豬同學佢就唔見人喎, 又再一次我地俾呀豬同學佢fake 起o左~~ 最重要係講grade佢先黎唔返, 唉...... 夜晚, 嚮學校度做fyp, 做到成十一點先走...... 但係呢, 嚮返屋企o既途中, 當我正考慮緊陣間返到去仲on唔on9 o既時候呢(online就online啦, on9, 你就真係戇鳩鳩啦~~), 吳子陽佢打黎, 話唔識畫graph, 但係o個陣我仲未食野架喎, 咁我話要食埋野先會返屋企架喎, 等佢可以知難而退, 點知...... "唔緊要, 我幾夜都等得" 咁...... 唯有返去online囉...... 又三點先訓......
星期五, 今日返去做lab, lab 同lab...... 好充實咁又打下波, 打個半鐘頭波都係玩比賽, 正呀, 好耐未試過玩得咁開心~~

二月廿三至廿八o既midterm週

星期日, 當然要返工啦, 返到去, 都已經唔記得做過o的乜野lu, 好似溫過下書咁, 因為, 星期三會有兩個midterm, 真係攞命...... 夜晚, 當然係溫書啦~~ 一路溫一路睇十萬火急, 兩日後就唔到你唔十萬火急啦~~ 今日種o既因, 大後日得o既果呀~~
星期一, 今日返工返學返工, 即係溫書上堂溫書... 如是者, 咁就一日, 死火, 都唔係溫得好多添, 咁...... 後日等死......
星期二, 今日係四月一日, 愚人節快樂~~ 今朝都唔好玩o既, 個個人都俾我玩唔到...... 反而玩翻自己轉頭囉, 做Lab超o左時, 好彩最後都做到, 唔到遲o的返黎補...... 哎呀, 咁咪無飯食囉, 唔係, 應該係話, 哎呀, 咁咪無早餐食囉...... 好在之後有一堂唔駛上, 有時間食飯o者, 唔係實聽餓死...... 飯完, 上堂, 飯氣攻心, 即係訓o左...... 之後就繼續溫書... 溫到咁上下就去食野, 食完野就去上tutorial, 聽日midterm o個科o既tutorial, 幾大都上啦, 上完明幾多呀, 正呀~~
星期三, 今朝一早就返學, midterm... 份卷... 唉, 都唔知叫做識定唔識囉...... 之後Barn, 原本諗住barn o既時候可以溫書, 點知... 相信都係因為之前o個個影響, 攪到成個人都hea o左好耐先識溫書, 但係hea完之後就已經夠鐘放barn, 簡單黎講即係無溫過...... 之後就食飯, 食完飯就夠鐘再Barn, 終於都可以溫下書啦~~ 溫到咁上下, 都係眼訓...... 如事者就溫o左陣書, 之後就去o左食o個Tea先, 跟住啦喎, 當然嚮食完野之後, 我o既一位朋友/敵人又再出現, 無錯, 始終我都未嘗試過戰勝過周老先生(即係周公呀), 事關佢o既絕招, 渾噩眼皮下垂, 足已令我倒地, 然後安然地睡著...... 好彩佢今次發o既功唔係太強, 幾多成功力我唔太清楚, 因為我訓o左陣就有翻知覺, 識得繼續溫書...... 但係時間已經所剩無幾, 唯有聽天由命把啦~~ 終於都考完, 結果成敗呢...... 都無眼睇lu~~ 夜晚唔想訓到三點先訓...... o的midterm攪到我灰哂......
星期四, 今日可以訓晏o的o的o的o的咁啦~~ 咁之後就上堂, 上到咁上下堂, 肚餓喎, 最後就嚮轉堂o既時候去o左買LG7食, 成個茶餐咁買嚮個lecture度食, 某程度上我都覺得我幾惡...... 夜晚就做FYP, 應該都係最後o既programming啦~~
星期五, 今日要返工, 但係成十一點我先扎醒囉...... 都仲趕得切o既~~ 今日成日都好似無乜點做過野咁, 但係就夠鐘放工啦喎~~ 爽呀~~ 夜晚, 終於都可以過一個比較無咁大壓力o既夜晚啦~~ 輕輕鬆鬆咁睇下書~~ 嘿嘿, 聽晚你就知~~ 但係我都試個MP3 player試到3點先訓......
呢篇野又攪到週記咁, 無法啦, 無時間打丫嘛, 原諒我啦~~