雜記

唔覺唔覺都有一排無打日記lu, 事關返工o既野, 唔係日日差唔多就係公司野, 唔可以亂咁講, 所以就無野好記, 剩低o個o的, 就係呢幾樣野~~

《Mercedes, Audi, Porsche》
有日搭巴士返工o既時候, 嚮中環度有個小朋友同屋企人上車, 個小朋友一上到車就好似好興奮咁係咁叫, Daddy, 媽咪, Daddy, 媽咪... 十足十國泰o個個小妹妹咁...
而我, 亦都俾佢係咁Daddy, 媽咪而嘈醒o左... (灣仔去中環只係十分鐘咋喎, 咁快訓著... 事關搭車可以做o既, 唔係打機就係訓覺, 而嚮巴士上面打機係極容易暈車浪的... 所以我通常都會選擇後者.)

當俾佢嘈醒o左之後, 就聽到以下o既一番對話
小朋友：『Daddy Daddy, Mercedes~~』
小朋友：『Daddy Daddy, Mercedes~~』
媽咪：『呢個唔係Mercedes呀, 呢個係Audi呀~~』
小朋友：『Daddy Daddy, Audi~~』
小朋友：『Daddy Daddy, Audi~~』

估唔到咁細個小朋友就已經講車... 咁遲o的大個o左佢咪會講：『Honey Honey, Porsche~~』


《Ｐ牌》
考到個車牌, 唔覺唔覺咁就兩個禮拜, 拎埋個車牌, 唔覺唔覺咁就一個禮拜, 而我相信係第一批要掛Ｐ牌o既畢業生... 由二月九號開始報名, 考到牌o既同學就要掛Ｐ牌, 但係我考完之後到而家, 呢個禮拜入面, 無論搭車或者係行街, 都唔係好覺有輕型貨車或者私家車掛住個Ｐ牌嚮條街度行... 唔通o的人係真係考到都唔出黎楂車, 等過o左一年先?!


《ＭＳＮ個人信息》
有日, 嚮MSN度見到有個人o既個人信息超過癮, 仲要係勁押韻, 嚮度分享下啦~~
『神功蓋世, 頂你個肺』
雖然唔知佢做咩事有句咁o既野, 同埋佢而家已經delete o左, 所以呢, 聽完笑下就算啦~~


《檸檬茶》
話說有一日, 我返下晝, 咁當然係嚮屋企度食埋飯先返工架啦~~ 點知返到去, o的同事未食飯, 叫我一齊去canteen坐下, 咁見都無乜野做, 去啦~~ 好順便咁就叫o左杯凍檸檬茶啦~~
之後夜晚, 得我一個人返, 所以就嚮Canteen度食啦, 咁o岩又口渴喎, 就又叫o左杯凍檸茶飲~~
放工, 返到屋企, 唔知點解又有o的口渴, 相信係Canteen 味精之過, 又好順手咁就嚮雪櫃度拎o左盒檸茶黎飲...
事後先發覺, 我o個日一日飲o左三杯/盒檸茶, 死火啦, 咁飲法, 會唔會糖尿架......
但係除o左檸茶之外, 我都唔係好鐘意飲其他野, 咖啡奶茶, 飲完個人會飽飽滯滯... 華田好立克, 凍o既唔係太好飲, 都係留翻嚮早餐度飲好o的~~ 所以剩低o既係, 檸茶... 唔好咁快糖尿就好了......

尹光 - 一個黐膠線的少年

尹光 - 一個黐膠線的少年

有個少男，佢忠心可靠，
誠實謙虛，心地好，
人又有禮，品性敦厚，
咁好青年，極少有。

佢叫志華，係膠廠工作，
成日一早返工廠，
勤力到痺，分秒工作，
縱使超時沒嗟嘆。

我要向上，我要發達，
看他每日爭取，
我要努力，我要發達，
社會進步多得佢。

看這少年，得廠長稱讚，
模範職工頂呱呱，
還重讚佢，黐膠線，
鐵打超人，技精讚。

看看志華，佢認真肯搏，
勤力天天黐膠花，
還重晚晚, 黐膠線，
每天超時，沒偷懶。

我要向上，我要發達，
看他每日爭取，
我要努力，我要發達，
社會進步多得佢。

[HKG原創] WALL-E x Eason 陳奕迅 七百年後 MV

前陣子搵接駁鈴聲o既時候, 聽到呢首近期都幾Hit o既歌, 於是就google呢首歌, 點知俾我搵到呢段片喎.
呢段片應該係自制的, 但係做得勁好, 諗起好耐之前睇Wall E o既片段. 好感人o既一齣動畫/戲, 而呢段片, 就係一段好感人o既片.
p.s. 可以o既話請用HD觀看.

學/考車記

尋日, 我終於都通過o左呢個駕駛考試, 取得合格o既成績.
首先, 我要多謝o既係我媽媽, 呀媽, 我得o左啦~~ (發乜鬼野神經呀你 =.=)
今次終於都考到牌呢, 真係要多謝 黃在田 黃師傅 佢真係一個好師傅, 唔似得上個師傅咁衰, 又開收音機, 踩住極力子之餘又踩住我個Break, 都唔知佢想點, 黃師傅佢乜都唔踩之餘, 仲好好心機同耐性咁教喎, 粗口幾句實有架啦, 但係就唔係要黎鬧我架喎, 係鬧o的衝出馬路o既盲毛~~ 同埋o的大直路都係踩得二十o既其他學校師傅~~
話說考牌日, 本應係考十二點四o既, 咁考之前就應該去學多堂咁架啦, 比著其他師傅呢, 唔夠鐘都唔教你, 但係呢個師傅呢, 原本約佢十點半, 等佢之前可以考多個學生, 點知前一日知道o個個學生就唔得閒, 咁佢就話學早o的, 等學完之後抖一抖先再考, 比著其他師傅, 唔休息下, 理鬼你丫~~ 準時十點到, 佢第一句講o既野係：『收到風喇, 今日有四個考牌官, 個個都應該唔難考o既~~ 但係個個都係鐘意轉左, 得一個係會轉下右 (考試路線有兩條, 一條係左轉先, 另一條係右轉, 而右轉條路係比較易的)』 你話呢o的師傅嚮邊度搵丫, 連考牌官係邊個都知, 簡直無得頂啦！ 如事者, 當然要練多陣車啦, 而佢亦都嚮我學車o既四堂入面(每堂兩節, 即係個半鐘), 俾我偷雞行o左兩次o個條有個L字又有個交叉o個條路, 俾著我以前o個個師傅, 理鬼你啦, 你行唔到就你o既事啦~~ 雖則我楂上去o個陣時都有o的爻, 驚上到去就俾差佬見到, 但係就真係有用架囉, 呢o的就真係叫試場實地練習喇~~ 練到差唔多o個陣時, 都係時候去報到, 等o左好耐, 師傅同我同o個o的呀姐佢傾o左好耐, 幫我舖橋搭路, 等著個好官先去報名, 呢o的師傅嚮邊度搵丫~~ 而我就嚮等o既途中, 俾師傅佢見到我上次考o個張黃紙, 佢一睇... 原來上次o個個考牌官係一個極之奄尖o既考牌官... 一剔你肥就會剔你幾百樣野... 唉... 等等下, 又見到o的第一次考牌o既同學考調頭泊位, 最後鏟o左上石壆... 真係好慘, 之後o既泊位呢, 泊到一半佢就已經踩爆o左個雪糕筒... 師傅話佢應該係比頭先個調頭上壆攪到佢手騰腳震, 黎緊o既路試應該都凶多吉少架啦... 真陰公... 之後又聽到一個o岩o岩考完o既女仔話：『o岩o岩有架車好好架, 佢讓我架, 點知俾佢後面架的士攝上黎呀』聽到都覺得佢慘... 又係俾o的死人的士佬害囉... 等o左陣, 都係去個廁所先, 原來考牌個間屋仔度可以借廁所架喎, 一入到去, 咦, 有人添, 嚮出面等陣先~~ 點知一出黎o個個就係一個考牌官?! 唯有向住佢笑一笑, 心諗, 而家唔好禮貌o的, 轉個頭係佢考我咪PK?! 而佢都好好人咁回以一笑... 去完個廁所, 等多陣, 就到我考... 心情無之前咁緊張, 因為其實已經考到個人"謝"哂... 得 其實同 唔得 都已經無乜分別... 唔得, 咪再考過囉, 咁... (講到好似唔關錢事咁... 考多次要兩千幾銀架...) 考牌官好順利咁開車門(其實我已經唔記得佢係唔係我頭先去廁所o個個考牌官), 坐上黎, 我就講o左句『呀Sir早晨』雖然而家已經十二點幾, 但係講句早晨應該都無乜問題掛, 而且呢個考牌官超好人, 佢見到呢架車有個位係可以放我張身分證同我封考牌信, 佢就好好人咁幫我放住嚮o個度先, 話叫我考完先拎翻~~ 我亦都講o左幾次唔該呀Sir. 繼續做個視力測驗之後, 就開車lu~~ 果然係好順利咁轉右再轉右, 沿途都ok, 係前面有架單車友嚮度係咁踩, 攪到我轉到三波之後就唔踩咁多, 費事跟得佢咁貼... 亦都唔好超速... 事關有一次學車o既時候, 我見無車就唔覺唔覺踩到上五十, 師傅就即刻話我：『咪踩咁快呀, 去到三四十好啦, 考牌o個陣見無車就會唔覺唔覺咁踩得咁快架啦~~』原來踩到去五十都唔覺咁快架喎... 最後, 考牌o個陣, 亦都好順利咁過o左呢條路~~ 之後就繼續行, 沿途都無乜野, 直至一個路口, 考牌官話：『前兩個燈位轉左』 而我就嚮第一個燈位之前, 見到前面有兩架車, 後尾o個架打哂左燈, 嚮燈位之前停o左, 我就準備轉線黎嚮第二個燈位轉左, 突然間, 考牌官大喝一聲：『前兩個燈位呀！』我好彩無乜點俾佢嚇窒, 點知... 停o左嚮架車後面, 見到已經轉哂綠燈都唔開車o既, 我o個陣時先意識到原來o個架車都係死車黎o既, 我心諗, 『唉... 仆街啦, 死車唔係打死火燈而係打左燈架, 今次仲唔兇多吉少.......』事關我入o左左線之後, 係極之難有機會俾我轉翻出黎右邊架囉, 你架學神車, 邊鬼度有車咁好人會讓你呀... 等得黎你都唔覺唔覺做錯事而肥鬼o左啦... 但係好好彩後面有架德安o既學車, 佢師傅好好人咁讓我, 真係極之唔該哂佢呀, 多謝哂你呀~~ 而我亦都繼續開車. 第二個燈位轉完左之後, 去到臨尾o個條路啦, 今次唔知點解又極之多死車, 除o左我o個面之外, 連對面線都有死車... 就嚮我過緊死車o既途中, 對面線有架車駛到埋黎呢兩架死車位, 仲要係的士黎架喎... 哎呀, 今次PK喇, 我有諗過停黎讓佢架, 但係我停o左, 佢都係開唔到架o者, 最後嚮少於零點五秒o既時間內, 我決定o左, 繼續慢慢過埋架死車！ 繼續行, 最後順利返到試場, 轉多兩個彎車上去上面！ 之前兩次, 考官都會叫我停嚮中間, 架死車後面, 點知今次呢個考官就咁話駛上去啦, 我心諗, 咁即係點呀? 你唔講駛到去邊到停, 我預唔切停架喎... 駛到去中間, 我唯有問多句：『嚮邊度停？』考牌官依然係講話：『駛上去啦』我唯有Ｏ咀, 打燈擰頭, 駛過埋嚮中間o個架車, 之後就慢慢咁駛上去, 駛到咁上下, 佢就話：『就嚮呢度停啦！』我唯有慢慢停埋架車, 之後拉手制熄匙入波, 考試完畢... 個心諗緊, 點解考牌官會叫我停嚮o的阻街o既地方架... 嚮呢個時候, 就諗翻起之前嚮等報到o既時候問過師傅, 『點解o個架考車駛到咁高停o既？』『因為上面無考車囉, 同埋考牌官個office係嚮上面架嘛~』考完之後, 我都好有禮貌咁講o左句『唔該呀Sir』雖然明知今次有好大機會會又再肥多次... 落車o個陣時, 師傅問我：『考成點呀？』我唯有答：『我睇錯o左架死車呀...』師傅一聽到, 都打o左個凸, 就話：『唔緊要啦, 返去等成績啦！』咁我唯有抱著一個等多一次死o既心態去等成績啦... 入到去, 等o左一陣, 本來有諗過想飲杯水黎定一下, 但係個人好似震到唔識郁咁... 最後... 都係乖乖地咁坐嚮度等叫名啦... 等o左一陣... 『麵王之王』咁我就行o左埋去counter度, 『叫咩名？』『麵王之王』『等等下...』(佢o個陣時唔知搵緊o的咩...)我已經望到張黃紙, 『合格』o個一個格仔填滿o左, 呀, 好野, 終於都考到個牌啦~~ 出到去, 見到師傅, 打o左個OK o既手勢俾佢, 而我個心亦都仲係度震緊... 上到師傅架車, 佢見到我成身標汗... 就話：『嘩... 做咩咁大汗o既...』『緊張丫嘛... 第三次啦... 終於都考到啦...』
呼~~ 終於都考到啦~~ 好野~~

病...

話說上篇我o岩o岩過o左probation, 拎到公司個medical, 誰不知......
四月第一個星期都未過就已經病鬼o左... 放兩日假, 嚮屋企度訓足兩日, 睇完個醫生都無用... 訓足兩日個人都仲係腳步浮浮咁, 真難頂... 星期日同星期一得我一個人返工, 頂住咁返去...
所以... 星期二就已經死o左, 最後焗住請sick leave...... 我唔想架...... >.<"
同個醫生講話想要兩日, 佢竟然答我話, 唔得, 最多俾一日, 唔得o既你聽日再黎睇, 我再俾多日你~~ 咩醫生黎架..........
攪到而家要返通宵, 希望唔好繼續咁病就好了......

三月記

估唔到, 話咁快就過o左一個月
呢個月, 返工o既野都開始上到手, 但係亦都仲有好多野唔識, 亦都要同事幫手, 要請教同事, 希望我唔好繼續攪亂檔好了...
基本上, 我月中就應該已經過到probation, 正常o既情況之下, HR應該會有封信話我過到probation, 但係呢, 過o左probatoin o個幾日, 我都仲未收到信喎, 驚架大佬, 莫非佢唔俾我過probation?! 定係我表現差, 要過多三個月先過probation呀...... 過o左大約兩個星期, 我收到HR通知話我probation之後先有o既benefit攞得啦喎, 下... 哦... 咁咪去囉, 諗住可以順手問埋佢其實我係唔係已經俾人加多三個月probation之際, 我大大佬佢俾封信我, 『哎呀，唔記o左俾你地添』(我同另一個差唔多時間入職o既同事) 哦... 大大佬, 乜搵o的咁o既野玩呀... 攪到我驚o左成半個月... 不過應該係大大佬你貴人事忙啦, 都唔好咁嚇我丫, 人地心血少呀......
話說二月同三月一樣, 亦都係有一個黑色星期五, 二月o個個咁o岩係我生日, 應該都頂得住一下半下, 未死得, 但係三月呢個就...... 嚮呢一日, 得我一個返下晝, 嚮下晝六點度, 其他同事已經放哂工o既時候, 突然收到樓下倉o既電話, 下面o的機乜乜乜乜唔得呀, 下... 呢o的乜乜乜乜我唔識攪架喎... 焗住打俾我大佬, 『下面o的乜乜機唔得呀』 點知過o左一陣, 下面大佬打上黎, oh... shit... 最後下面大佬打哂俾全部人(即係我對上o個o的), 叫佢地整, 其中一個同事打黎叫我幫手, 佢唔醒起我都唔記得今日係黑色星期五... 全公司人走哂先黎o的咁o既野... 果真黑仔... 最後? 緊係我大佬佢攪掂啦, 我呢o的小薯仔, 邊識咁多野呀......
基本上嚮呢度返工都幾好, 除o左要勁早起身同返通宵之外, 其他野都唔錯, 得閒又可以見住o的飛機~~
唔~~ 短時間之內我應該都唔會轉工住掛~~ (有其他人請你先講啦~~)