考試週 十一月十四至廿一

估唔到話咁快又考完個試, 咁先得閒打下日記~~
星期四, 考381前一天, 所做o既就係溫書, 溫381, 事關個人好似無溫過咁......
星期五, 今日考381, 個時間本來好好, 下晝四點半先考, 咁o岩呀婆佢今日出院, 所以好早就返o左學校溫書, 廢事我嚮阻手阻腳嘛, 人多手腳亂呀~ 所以都係早o的返學好~ 溫書溫到下晝先食Tea, 食完再溫多陣就考試了~ 但係... 感覺唔太好...... 好似識又好似唔識咁... 最後做完之後就走o左... 因為... 聽日考150, 仲要係朝早八點半囉... 唉...
星期六, 今日朝咁早就返o左去考試... 期望合格就好了... 我要pass架咋... 考完之後, 感覺有廿分合格都應該ok o既...... 好早咁就考完, 去o左呀熙個hall度Hea~~ 但係呀熙佢考完之後對於Quit U o既感覺特別強烈... 食完飯之後溫多o左陣書就走lu~~
星期日, 自從考完150之後, 完全無心情溫書, 唉... 整日都嚮度Hea...
星期一, 今日亦都同尋日一樣, 但係仲有兩科架喎, 點算呢... 後日就考啦喎... o的書硬溫入腦......
星期二, 今日成日都係溫書同溫書, 但係... 用o左成日都寫唔哂張cheat sheet... 到夜晚都只係寫得一半...... 放棄了... 都係訓覺啦, 聽日考四點半, 聽日先再寫埋餘下的部份...
星期三, 今日考試了, 上晝就返o左學校溫書, 中午同埋nicole同yannes一齊食飯, 之後下晝溫到就黎癲先寫得埋張cheat sheet...... 最後考試, 張cheat sheet實際用得著o既地方只有兩題咁多...... 溫就溫幾日, 做份卷就做得o個一個鐘... 但係我九個字就已經走o左, 無他o既, 合格便已經足夠~ 走o既時候, 我見呀Joe都未出黎, 但係Jolie同晶晶佢地話, 唔好等啦, 佢有排呀~~ XDDDDDDD 呀Joe, 你做乜事成日都做得咁慢架~~
星期四, 今日係我嚮科大o既最後一個考試... 但係估唔到最後呢個考試都波折重重, 我想考埋最後一個試o者... 先有本來話係有sitting plan的, 但係最後呢, 佢無預備到, 攪攪下攪到遲o左十五分鐘先開始... 到頭來咪一樣無sitting plan... 考三個鐘, 真係慘過考A-Level... 撞完一百條MC之後, 終於都完成o左我嚮UST o既所有考試~~ 原本諗住去飲茶o既, 但係由於佢遲o左三個字先開考, 咁就攪到遲三個字先完, 收卷又收o左三個字喎... 真係多得佢唔少囉... 本來可以三點半去飲下午茶, 點知原來四點已經無... 最後唯有去LG7度食.... 食完之後就去o左執埋254 o的野拎去還, 點知... 還漏少o左個火牛, 去拎翻o既時候佢已經收o左工... 唯有要麻煩茵茵佢聽日還啦~ 估唔到今日做咩都一波三折... 好少少o既咪係臨走o既時候教o左呀熙佢少少254囉, 希望佢無問題, 順利可以同我地一齊畢業啦~~
如事者, 今日咁就過o左我嚮科大o既最後一個考試週~~