六月廿六至七月初一

星期一, 原本今朝reg barn helper, 但係學校個web server死o左喎, 咁就攪到延遲一日reg, 本來十點起身, 知道o左延期之後又訓翻...... 食完飯之後上堂, 上個堂之後就返屋企. 夜晚, 學校個server都仲係有問題, 點知呢, helper呀頭就竟然話等個server無事之後First Come First Serve喎, 唔係下...... 嚮我嘈之下, 就話嚮uwant度出Post... 呆... 最後就用翻我之前整落o既玩具黎幫手. 嚮呢個時候, 個server又好似無事喎... server呀server, 咁大整蠱呀.
星期二, 朝早返Barn, 原本諗住溫書, 最後就掛住MSN... 之後一支公食飯, 就上堂, 亦都係咁就一日...
星期三, 亦都係要返Barn, 亦都係諗住溫書, 最後就無mood... (懶你就懶啦, 藉口~~) 上埋下晝o個堂之後, 聽日考埋個試就完o左呢個summer course架啦, 正呀~~
星期四, 今日考試呀, 晨咁早就返到去, 但係呢, 晶晶就好慘, 大埔爆水喉, 攪到遲到, (爆水喉唔係應該制水架咩, 咁制水又點可以攪到佢遲到呢? 爆水喉之後塞車呀, 唔通係沖沖下涼無水咩, 有無睇新聞架你) 但係呢, 呢個考試, 因為驚有人請槍, 所以就嚮入門口前check學生證, 原本係兩點開始, 最後就兩點半先開始, 所以晶晶好彩, 無遲到, 雖則已經飛o左六十蚊的士, 當係破財擋災啦~~ 同埋呢, 我地由上次midterm o既經驗, 坐最尾係走得最快, 所以我地最遲先入去考, 嘩正呀, 果然係第一排走呀, 唔駛嚮度坐咁耐, 但係坐最前o既人就最陰公, 呆坐咁耐之餘都仲未走得... 好野, 完o左一個course~~
之後就去o左打波, 估唔到見到個中學同學一齊喎, 世界真係好細~~
星期五, 今日去o左呢個踩單車呀, 正呀, 唔正呀, (點呀你, 又正又唔正, 你想點呀) 正o既係終於都有得踩單車喇, 唔正o既係, 又唔係好大太陽, 但係都曬到隻手塊面同條頸都紅哂, 成條紅燒排骨咁, 仲有少少痛添, 認真陰公... 今日剩係得兩個人踩, 而我亦都係佢o既第一次, 無錯, 係第一次~~ 你班PK唔好諗錯呀, 人地係第一次踩長途單車架咋, 我係同佢o既第一次單車友咋. 估唔到佢都幾好氣架喎, 第一次就可以去到大尾篤條壩, 幾勁~~
租車o個陣, 好戥公園入面o的舖頭慘囉, 俾出面o的人搶哂生意, 今次去仲比上次平o左o的添, 而家乜都加, 佢竟然減喎, 反通貨膨脹, 老闆呀老闆, 你真係慘...
今日係媽媽生日, 同o左佢去食齋, 咁就幾舊水... 但係都無乜所謂啦, 一年一次~~ 下年我生日o個陣叫佢請我去食buffet先~~ 呵呵~~ (今晚早o的訓就有得你食, 發個好夢啦細路)
打個title o個陣先發覺, 原來農曆六月係得廿九日架咋喎

---

內容最後更改於 2008-08-06 01:15:25