六月初五至初八

星期一, 今日一早起身, 天氣情朗到落兩... 本來諗住去踩單車, 唔通連個天都唔鐘意我... 希望在明天丫嘛, 但係個天已經落o左成個星期雨... 估唔到佢真係唔鐘意我... 本來係約o左呀Fred同嘉茵佢地去踩單車, 最後呢, 緊係有去到踩啦, 去踩... 冰... 去o左呢MegaBox度踩~~ 我o既第一次呀... 咁就仆街o左兩獲... 果然第一次係比較痛o的呀下~~ 總算係叫做踩過下咁啦, 都幾好玩架~~ 之後就去o左食野同打機~~ 再跟住就去o左睇戲, 街頭超人~~ 呼~~ 超人呀~~ 好好笑, 套野勁多AssHole~~ 笑到呢~~ 如果愛情同埋地球, 我都會揀地球, 不過如果無咁高lv, 愛情同埋事業, 我會選擇愛情, 兩個人一齊捱, 捱得開心o既話, 無錢都唔係一個問題, 有情飲水飽, 我係咁諗o者, 有無人會肯同我捱丫, 唉...
星期二, 今日返Barn, 食個飯之後就去o左David個Hall度玩呢個鬥地主, 有o的似鋤大D咁玩, 但係默契都幾重要, 有贏有輸咁啦~~
星期三, 今日都係要返Barn, 下晝諗住去睇學車o的野, 但係睇翻原來趕唔切, 事關筆試係排嚮八月十一號, 即係呢個O camp o個陣, 咁所以呢, 過兩日先去睇都唔遲... 況且o個日有人陪, 幾好~~ 下晝路經銅鑼灣o既時候, 入o左一入去呢個香港駕駛學院o既門市度睇, 得一個人, 等o左成半粒鐘先問到野, 加埋加埋仲有成皮野先報到, 乜真係咁貴呀...... 萬一真係肥o左, 要考多次咪又多幾千... 認真貴呀下... 都係等過兩日去睇下第二間先~~
星期四, 今朝好好訓, 但係個好盡責o既鬧鐘十點半就叫o左我醒, 估唔到周公o既神功竟然俾呢一個黃毛丫頭(我個鬧鐘真係黃黃地色o既)一野就破o左, 我想訓都訓唔翻呀, 嚮張床度典o左成粒鐘, 最後都係起身罷了...... 下午去o左剪頭, 變o左個數字頭~~ 咁就一日...