單車記

話說今日去踩單車~~
但係一早, 七點九咁早就俾人電醒o左(電話個電, 唔係濕電個電, 我都未轉身就已經俾人嘈醒o左, 慘......), 晶晶同學打黎話佢大埔o個邊落雨喎, 咩話, 落雨?! 咁即係個單車會泡湯啦, 唉...... 唔通連個天都唔鐘意我...... 之後打俾Denny同學, 原來佢柴灣都落緊, 但係灣仔同埋葵涌荃灣o個o的又無兩喎, 我心諗過雲雨黎架o者~~ 最後決定, 都係照去~~ (呢個決定原來係一個好重要o既決定)
遲o左少少出門口, 但係都係去食個早餐先, 原來吉野家o的早餐同埋下午茶o既飯都加o左價喎, 要$15個呀, o的野就越來越貴, 但係人工又唔見佢有得架囉...... 之後去搭車, 大C相信係最早到o既一個, 我連火車都未轉佢就已經到o左, 葵涌唔駛半個鐘就到o左富安花園囉, 果然夠快呀下~~ 之後晶晶打黎話嚮大圍, 我叫佢等埋我, 佢話佢去個廁所先, 但係原來佢係嚮大水坑囉, 攪到我嚮大圍度等o左佢成個字, 夠竟係佢講錯定係我聽錯呢? 我都真係唔知...... 話咁快就去到大水坑啦~~ 等佢地食埋個早餐之後, 就去租車, o個時其實係有少少毛毛雨o既...... 但係o的雨都係過雲雨黎架o者(我估......, 又係你估, 次次都係你估, 今次就係因為你呀！！) 去租車, 個呀叔話要放低證喎, 我緊係唔俾學生證佢啦, 俾第二張佢, 佢又話無相, 真係麻鬼煩~~
好, 出發~~
踩呀踩呀踩~~
咦, 有o的毛毛雨喎~~
咦, 越落越大喎~~
去到科學園, 都係避避先~~
咦, 有隻金蛋o既? 定係太空船黎架? 到最後都係唔知係乜, 好, 繼續踩~~
都係有o的雨喎~~
繼續踩~~
又再大啦喎~~
都係再避避先~~
又細翻o的啦喎~~
繼續去大埔~~
入到去大埔壚, 茶餐廳食飯, 一睇個餐牌, 有天使麵食o既?! 茶餐廳都有天使麵食? 咁勁?! 但係又唔差架喎, 幾好食~~
好, 再出發, 但係都係落緊雨喎, 得到高人指點(←呢句係我嚮denny個xanga度抄出黎, 所謂o既高人, 其實係茶餐o既一個伙記)之後, 我地就買o左件便利雨衣(便利大垃圾膠袋), 再浩浩蕩蕩(所謂o既蕩係落湯雞o既湯)咁再出發~~ 好快脆, 我地就又去到科學園......路邊o既避雨處. 避多一陣雨, 而我亦都俾人指住黎影相......
去到水警o個度附近o既橋底又避o左陣, 點解都係越落越大o既?!
最後, 衝呀~~ 衝返去大水坑~~
好野, 到啦, 去到, 同老闆吹o左陣水, 發覺今日咁都租出o左卅架車喎, 好野, 勁~~
個身濕哂o既Denny, 一入到去火車站, 咦?! 點解好似咁凍咁o既...... 作感冒啦佢, 唔...... 唔關我事架可? 但係佢仲要俾人叫返UST喎(事後知道係呃返去, 唔係叫返去)~~
返到屋企, 隻鞋都仲係好似成鞋水咁喎...... 好似著緊水鞋但係隻鞋係裝滿水咁架囉......
多謝咁多位陪我癲o左一日o既同學~~ 排名不分先後, 包括Denny, 呀豬, 晶晶, 大C 同埋 呀楷~~