黑?

黑仔?
呢期, 講真, 都真係幾...... 黑......
追溯返去7月, 陽光普照, 係咁搵人去玩, 諗住去睇戲啦, 踩單車啦, 陽光與海灘啦, 仲有就係O Camp, 但係最後, 乜都攪唔成. 首先, 單車, 搵唔夠人, 咁就無人去, 5個都話少, 一個唔去咁就連鎖反應咁全部人都唔去. 好, 之後去睇戲, 原本已經有人話去睇, 但係, 唉, 睇原裝日文版, 得一間戲院有, 呢個都唔係問題, 但係剩係得早場囉, 頂, 我o的同事全部都要返工, 放工先去睇得, 咁即係無得去睇啦, 真係自己一個人去睇咩, 扮哂電影人咁呀, 卡通片, 自己一個人去睇...... 我諗俾個場務見到都我一條麻甩仔去睇, 佢真係會以為我係電車男, 咁戇鳩...... 陽光與海灘, 7月就真係有陽光呀, 但係無海灘呢, 紅潮丫嘛, 到八月, 有海灘啦, 但係就無陽光呢. 仲有O Camp, 有個同學係SU裡面做, 佢話搵組爸, 好, 玩丫, 有咩所謂呢, 玩人之嘛, 又唔係俾人玩, 仲有係SU 大O喎, 實有得攪啦, 點知, 個同學竟然同我講攪唔成, 大O都攪唔成? 真係攪唔成, 每次返到去, 見到一二百人嚮Atrium度O Camp, 總有o的...... 竟然連O Camp都攪唔成, 真係唔到你唔認命......
好, 到8月, 7月暑假o個個course, 考得唔好, 不過其實某程度上都可能係無心機溫書掛...... 先係本來約到表弟踩單車, 點知落雨, 好在最後都有得玩, 打下波咁囉, 但係相比起我最想o既踩單車, 都係比不上...... 之後就係會考放榜(放榜又關你事?) 知道o左某個ssh o既成績之後, 唔知點解即刻打定輸數(咩輸數? 咁你都要問, 唔係下你, 費事彩你), 真係唔知點解, 第六感掛. 跟住就到今日, 八號風球(八號風球咪好囉, 唔駛做喎), 但係我呢o的計鐘o既, 多勞多得, 無得勞, 即係唔得(唔係唔得, 係......屎火, 我都唔識講) 用o左成個鐘車程, 返學校只係為o左兩個鐘o既helper o者, 個八號風球咁都要奪去我一個鐘o既錢, 走o個時, 等車等o左九個字, 總車程咁就用o左兩個半鐘, 但係只係返一個鐘頭helper喎, 咁你話呢, 本來仲諗住幫人買notebook添, 但係, 唉...... 灰到, 真係好灰...... 呢個都唔夠灰, 最灰o既係, 原來我對上o個篇週記話晶晶同學幫我搵多四個鐘錢, 點知, 原來最後係流料, 唔係先到先得, 而係老闆會揀人黎做, 真係灰到呢...... 三個鐘, 三個鐘頭錢咁就幻化成泡影...... 仲有o個個鐘, 到現時為止都未知有無得返, 真係灰到, 黑.
認命啦~~ 有時有o的野, 整定o既~~ (唔止揚:乜睇得咁化呀) 有時o的野, 唔化都唔得啦, 開心又係咁過, 唔開心又係咁過, 睇化o的, 人都會開心o的~~