迪迪尼

今日去迪迪尼呀, 晨咁早就起o左身, 食個早餐, 搭成個鐘車先去到, 原來過地鐵青馬大橋o個時係乜都睇唔到架...... 悶...... 而呢個欣澳站呢就用呢個得我咁高o既幕門, 幾得意喎~~
至於架迪迪尼車, 就係用全自動駕駛, 真係無人楂架喎, 個樣就幾靚, 但係就唔夠位坐, 都唔知有乜好......
去到門口, 等等等等免費飛, 成十一點半先有, 算啦, 免費喎, 想點呢~~
之後就好快咁去o左巴斯光年就拎FastPass, 要十二點半先有得玩...... 唔緊要, 去玩o左個而家只係得佢先至有o的咖啡杯~~ 轉轉轉轉轉@.@"
之後就去o左睇下個獅子王度拎FastPass, 點知原來係無得拎o既...... 算, 去Winnie the Pool度拎, 點知張FastPass係已經去到四點八先有得玩......
咁就夠鐘去玩巴斯光年, 勁過癮, 隻船係有得自己控制左右轉架喎, 哈哈, 但係就勁難射中個目標, 得四萬幾分咋...... Lv3咁大把, 有無人真係可以去到Lv7架呢??
跟住就去o左食飯, 頂, 乜飯都係$45個, 不過就有杯幾大杯o既茶飲囉~~ 算係咁啦~
夠鐘去睇獅子王, 真人表演, 嘩勁好睇, 仲有丁滿與彭彭呀, 我到而家都係覺得丁滿只係一隻壁虎~~
係時候去睇巡遊, 但係發覺係唔好睇......
再黎就去o左呢個泰山樹屋, 嚮個湖中間, 我想知佢呢棵野點整架呢?? 幾有趣丫~
再黎就又排半粒鐘去坐船, 但係就同之前睇過o既片差唔多, 都唔差咁囉~~ 個導遊旁白本來都幾好, 但係同我地都唔係好夠互動, 攪到都無電視話好似入o左一個唔同o既世界咁......
再去o左睇立體影院, 帶眼鏡, 嘩好真呀, 仲有o的香味, 噴水, 勁好睇, 呢個正~~ 我呀媽見到有粒紅寶石竟然真係向前去拎...... 俾佢吹漲......
最後去o左玩Winnie the Pool, 點知其實都無乜好玩, 車, 得個坐字......
跟住佢地就去o左玩小飛象, 而我就緊係去玩Space Mountain啦, 單人位, 等五分鐘咋嘛, 但係就只係可以坐車尾...... 無帶眼鏡, 黑蚊蚊, 乜都睇唔到, 只係知道架野嚮度Fing黎Fing去, 一o的都唔好玩......
差唔多七點, 睇埋個煙花就走, 個煙花都係一般咁啦, 不過全日o的音樂都配得好好, 呢個唔錯, 值得一讚~~
返到屋企, 已經八點半......