週記

都係時候記翻低呢幾日做過o的乜, 啦唔覺唔覺都成個禮拜無心機打字
星期三, 都係要上堂, 放o左學之後就自己一個人去o左做Lab, 估唔到Compile一個Win CE加加埋埋要17分鐘, 都尚算可接受o既, 但係Lab1 都係收唔到電話架囉, 要坐最尾o個排, 最尾o個兩個位先收到, 都唔知點解UST o的Lab個個都收唔到電話架囉......
夜晚, 收到封Warning Letter, 唉......
Warning on Unsatisfactory Academic Progress
估唔到一科Math 就攪到咁大獲, 唉......
星期四, 原本係有得去睇跳降傘, 點知上晝落兩落到咩咁, 最後就取消o左, 改期去到七月二號先有得睇喎, 我o個日要返工囉, 原本諗住有得睇, 但係最後都無, 所以話呢, 有o的野, 真係整定架喎, 無得怨. 最後成日都係嚮屋企度Hea, 無心機溫書.
星期五, 都係返學, 上堂咁囉, 但係就聽極都唔明佢講乜, 所有Math course都係好難...... 放學都係去o左做Lab, 有o的唔識, 去搵老闆佢又唔嚮度喎...... 算啦, 遲o的先再做, 個Lab後面係TA Ricky房, 去o左問佢借野之餘仲知道請緊Lab Helper, 但係我時間唔o岩, 撞哂, 咁就打俾Denny, 睇下佢做唔到, 等佢可以唔駛咁Hea啦~~ (Denny, 我不嬲都咁好人架啦, 係你以前發掘唔到我o既優點o者)
原本今晚係去吳子陽屋企打Wii, 但係佢記錯o左, 唔係今日得, 而係聽日先得, 佢日前打俾我話記錯o左o個時, 我問佢, 你打o左俾其他人知未呀, 佢話"未打俾巴巴拉呀, 好緊張呀!" 咦, 唔通你真係鐘意巴巴拉?!
星期六, 返工, 好野, 終於都有暑期工黎幫手啦, 咁個上晝就唔駛咁慘啦~~ 不過只係見到一半人都唔夠, 原來, 有兩個仲係我師弟妹黎架添喎, 咁o岩都有o既?! 唔開心o既係老闆佢今日又唔知發乜鬼野神經, 係咁嘈, 今朝仲開咪演講添, 真係唔得佢死囉, 佢仲拎翻舊年十二月有人complaint份野俾我簽, 話我地要做多o的patrol喎, 就連AL都頂佢唔順, 真係死俾你睇...... 但係好開心o既係今日係吳子陽佢返工, 非常之好呀, 等我唔駛做得咁辛苦. 放工, 一班同事去o左佢屋企打機添, 我前兩日post o個條片咪係我地玩o既情形囉, 原來Wii真係好好玩, 好易玩上癮...... 前幾日叫佢download Mario Party 8原來真係好好玩架囉, 都無叫佢download錯, 五個人, 就算只係得四個人玩, 做第五個都睇得好開心, 你見條片就算係得一個人玩o個時, 其他人都笑得幾開心呀~~ 條片係我同吳子陽佢兩個玩o既時候呀Lok佢拍o既, 你聽到最大o個把聲就係佢, 至於左邊o個個就係之前同吳子陽佢有關係o既Rita(佢地o既關係係中學同學), 咁右邊o個個呢, 就都係同吳子陽有關係o既巴巴拉! 佢地現時o既關係係同事, 遲o的我就唔知啦~~ 嚮佢屋企食埋KFC先走, 食野o個時, 睇電視, 發覺兩個免費台都係播緊o的回歸show囉...... 都係睇Pearl, 咦, 佢架電視係有NICAM架喎, 我到而家都唔知pearl o的節目聽廣東話係點o既樣, 我地一聽...... 聽o左唔夠三分鐘就...... 都係轉翻做英文把啦...... (我發覺我呢篇野係咁叫吳子陽吳子陽, 都係叫翻佢Jelly好o的, 唔係俾佢睇到, 我個名又係咁嚮佢xanga出現架啦) 走o個時十點幾, 都仲係落緊雨, 一向勁懶o既我都係唔想開遮......
返到去, 一見呀Lok就叫佢send條片俾我, 十分鐘唔駛就放o左上youtube, 但係, 佢係打橫部電話黎影, 攪到我係打橫o左架囉, 用quicktime黎睇就可以轉90, 但係一放上youtube...... 最後我都係要將佢轉做avi先up上去, 不過我就變肥o左, 我變肥o左, 都係一件好事黎o既~~ 我有咁肥就好啦~~
星期日, 返工, 七月一日, 回歸十年啦咁就, 時間真係過得快, 但係o的巴士就改哂路, 要我去到入境處度搭車, 唔係下, 最後行o左去修頓度搭van仔, 返到去, 又係見到呀峰佢搗亂囉, o的野亂哂, o的紙亂咁放, 我尋日已經同o個兩個暑期工呀秋燕同呀文(我o個兩個師弟妹)講話如果你聽日返(星期日), 你同佢一齊就要自己執生啦, 我問翻佢地, 佢地話真係好亂囉, 入黎兩次, 兩次都係要執野架囉, 估唔到, 就連第一次見o既暑期工都俾o的咁o既評價佢...... 峰哥, 勁呀你~~
放工, 去o左同屋企人打羽毛球, 但係得兩個拍, 玩到無癮...... 六點玩到八點, 打足兩個鐘, 一個唔錯o既運動, 返到屋企勁攰...... 但係都剪o左條片, 事關今日返到去, o的人睇極都唔係好明我o個日究竟嚮度做乜, 剩係嚮度拎住支野嚮度fing下fing下...... 但係部機唔係好聽駛, 最後攪到三點先剪好, up o左上去之後未等佢avaliable就已經訓o左, 聽日要返工架~~
星期一, 相信係尋晚太夜訓o既關係, 今朝十一點呀媽叫先識醒, 仆...... 十一點...... 用五分鐘就梳洗好, 十五分鐘就食完個lunch, 搭車, 好在架車無遲到, 而我都無遲到, 返到去, jelly佢超掂呀, 頭兩個鐘無人幫佢都應付自餘, 勁呀~~ 但係wytus佢就, 佢蛇o左入黎兩個字, 我話佢, 你呀, book錯機呀, book o左o的backup機俾人, 萬人部機壞o左, 我地咪無機俾人囉, 佢竟然同我講話, "到時壞o左咪同佢講無機俾佢用囉, 咁我book俾你o個時無壞架嘛, 而家壞, 我地都無辦法架喎" 我心諗, 你唔係下, 咁樣同人講野, 你聽俾人complaint, 點知佢就話, 你complaint咪complaint囉, 好在佢係LAT o者, 一年後佢就應該唔存在呢個世界上, 邊個娶著佢, 真係貼錢買難受, 都唔知點解jelly話佢健談. 及後我問o左jelly三個問題, 點知佢有兩個答案都係揀wytus, 得最尾o個條係揀巴巴拉, 三條問題分別如下, "俾你揀, 你揀wytus定係巴巴拉", 第二題有o的唔記得, 好似係"你覺得wytus定係巴巴拉好o的", 最尾o個條係"兩個你揀邊個做女朋友", 佢個答案係"緊係巴巴拉啦", 個"緊係" 係好大反應咁答緊係, 呢三條問題同對答案我已經幫佢宣揚到全公司都知架啦, jelly你走唔甩架啦~~ 今日fiona同呀Lok佢地返o左黎, 好野, 有西餅食~~ 多謝兩位~~ 佢地成班人睇翻我尋晚剪片到三點o既成果, 佢地都話ok, 有埋o的遊戲畫面好好多, 知道我地兩個做緊乜野, 最抵死係呀Lok話我, "佢唔係剩係隻手郁咁簡單, 佢係連隻腳都郁埋架" 咁先係跳舞架嘛, 唔咁投入點得架~~ 你地可以留意翻條片o既第一個comment, 係jelly佢自己留o既, 我相信佢某程度上係有o的自戀o既成份, 但係應該好輕微, 未駛食藥住~~ (逃...... 唔好打我)
放工, 都係同屋企人去o左打羽毛球, 仲問o左jelly佢借兩塊拍添, 唔該哂呀, jelly你真係好人~~ 呀係喎, 我差你o個幾蚊到而家都唔記得還, 我唔係有心架...... 但係真係唔記得丫嘛, 你記住提我還喎~~
至於, 星期二, 成日都嚮屋企Hea過, 依然係無心機溫書, 星期五就mid-term, 真係想死......
呢篇野, 打o左我半日, 連打字都無mood, 點解我咁頹架?
現在時間係 七月四日凌晨十二時五十五分